Carnival og gleði

Hola a todos

Ég hef verið heldur löt við að skrifa upp á síðkastið en stefni á að reyna að bæta úr því á næstunni. Lofa engu en það er markmiðið :)

Síðan síðast þá er ekkert svo sem mjög markvert búið að gerast... Það voru próf í vikunni eftir að við fórum á ströndina og ég gerði eiginlega ekkert nema að læra... það var svolítið erfitt að læra bara á spænsku, var orðin frekar þreytt í endann á vikunni :) Prófin gengu reyndar bara vel var með yfir 83 í öllu og ef ég held því áfram út önnina þá fæ ég auka viku af fríi... sem væri frábært :) Ekki það að ég hafi einvher svaka ferðaplön en ef ske kynni að ég færi eitthvað er gott að hafa auka frí upp á að hlaupa.

Valentínusar dagur er haldinn hér í Mexíkó með prompi og pragt.... ekkert nema hjörtu og pör út um allt alla vikuna, við einhleypingarnir hérna vorum eiginlega búin að fá nóg að allri þessari rómantík :) Einn vinur minn, einhleypur, hélt Valentínusar partý og bauð upp á súkkulaði fondu, jarðaber, freyðivín og fleira gotterí. Það var ægilega gaman hjá okkur þarna þarna í the fabulous singles party... enda vorum við öll fabulous and beautiful.

Í síðustu viku komu Saskia og Kate vinkonur mínar frá Ástralíu til baka til Guadalajara og við fórum öll saman út að borða á Libanönskum veitingastað... það var svo góður matur ég hef ekki borðað neitt í líkingu við þetta síðan ég kom hingað, tabule og fleira sem ég gleymdi jafnóðum hvað heitir en er ógurlega gott :) Mjög góð tilbreyting frá Pizzum, salati og tacos... stefni svo að á að fara þangað aftur.
En allavega það var frábært að hitta stelpurnar aftur, verst að þær voru hérna bara í einhverja fjóra daga, og svo var stefnan tekin á Carnival í Mazatlan...

Charles vinur minn frá Englandi kom svo hingað á miðvikudag í síðustu viku, og kom með mér til Mazatlan á Carnival um helgina. Við vorum 16 held í heildina sem fórum saman, svo þetta var frekar stór hópur. Mazatlan er bær um sex tíma norður héðan við ströndina. Mér finnst bærinn mjög skemmtilegur, mikið af gömlum húsum, litlum torgum og sjávarsíðan eða Malecoun er æðisleg. Hún liggur við ströndina meðfram öllum bænum, eða meðfram öllum bænum við ströndina.... við röltum niður með henni á laugardaginn og tókum svona 15 pásur á leiðinni og hlógum af einkennilegum styttum af nöktu fóki í mjög svo einkennilegum hlutföllum, og slatta af hörfungum sem já var gaman að hlægja af líka :)

Charles átti afmæli á föstudeginum en eitthvað lítið varð af, þar sem við komum til Mazatlan snemma um daginn og hin voru að týnast inn fram eftir kvöldi.. svo á laugardaginn þegar hann var eitthvað þreyttur, þá skelltum ég ég tvær vinkonur mínar okkur í risastóran súpermarkað og keyptum köku og kerti handa honum og flösku af góðu tequila. Svo hittumst við öll fyrir framan hótelið (reyndar fyrir tilviljun við vorum bara búnar að tala við nokkra) og komum honum á óvart með afmælissöng og köku... held að hann hafi verið ánægður með það, vona það allavega :)

Carnival gekk sinn vanagang skrúðgöngur flugeldasýningar og meira djamm en nokkrum manni er heilbrigt... :s Hótelið okkar var við aðaldajamm götuna, svo það voru 4 stór svið með mismunandi tónlistar mönnum og stefnum í gangi a hverju einu þeirra þar að auki voru nokkrir klúbbar og veitingastaðir sem hver og einn hafði sína eigin hátalara fyrir utan með hverri þeirri tónlist sem hugsast getur svo, þetta var bara nokkuð fjölbreyttur hávaði. Held að það sé besta lýsingin :) Það var líka hummm hvað heitir það svona gervi naut sem er hægt að setjast á og það hendir manni af, nánast við dyrnar. Þau voru nokkur sem skelltu sér á bak en hann var frekar rólegur svo að þetta var ekkert svo spennandi, en einstaklingarnir sem fóru á bak voru þeim mun skrautlegri.
Ég held að það ætti einhver að koma til Mexíkó og kenna heimamönnum að gera flugeldasýningu, hjálparsveitin heima er bara nokkuð góð í þessu :) Þeir voru með fjórar mismunandi skotstöðvar, ein á ströndinni, ein til hægir við ströndina, önnur til vinstri og sú fjórða skip frekar langt úti. Skipið allavega byrjaði svo voru einhver nokkur gosblys á ströndinni, og sprengjur svona sittá hvað eða bæði hægra og vinstra megin og meðan það voru svaka gullregns sprengjur eða hva þetta heitir þar... þá voru nokkur blys í gangi á skipinum sem enginn sá þar sem stóru sprengjunar tóku alla athyglina... og þetta var allt eitthvað svona á mis það var ekki hægt að horfa bara í eina átt til að sjá heldur þurfti maður að hafa sig allan við til að ná að sjá helminginn.... var afar athyglisvert spurning hvort að björgunarsveitirnar skelli sér ekki bara út á næsta ári og redda þessu :)

Skrúðgangan var bara ágætt, mikið af litskrúðugum vögnum, upplýstum og dansandi fólki. Munurinn hér og á Brasilíu er mikill jafnvel þó að ég sá bara litla skrúðgöngu þar... hér þá er þetta mikið krakkar og fjölskyldur að dansa, í Brasilíu þá voru þetta meira ungt fólk og miklu meiri nekt og sensuality í allri sýningunni, þetta á ekki að hljóma eins og einhver klámsýning en samba og Brasilía og krakkar og Mexíkó þið sjáið muninn.

Ég fór og heimsótti frænku mína sem býr í Mazatlan, það var ánægjulegt svo gaman að tala íslensku :) Hún sótti mig niður í bæ og við fórum heim til hennar og hittum börn, barnabörn og tengdasyni og dætur og svo fórum við á sjávarrétta stað að borða. Var bara mjög ánægjulegt að hitta fjölskyldu og íslending :)

Sjávarréttir var annað frábært við Mazatlan, ég borðaði svo mikið af rækjum, skelfisk og fisk... þetta var paradís :)

Svo lá bara leið heim aftur til Guadalajara, skóli á nýjan leik og Charles farinn til Kúbu... og já raunveruleikinn tekinn við af glans og glamúr

Hafði það gott elskurnar bið að heilsa ykkur
Bkv fisk-svangi skiptineminn (breyttist ekki eftir helgina)

Blogg ég er að blogga

Það er greinilega kominn tími á nýtt blogg þegar hún móðir mín fer með ljótt og systir mín sem er í útlöndum þarf eitthvað að lesa....

Síðan síðast er ég bara búin að vera mikið í skólanum og læra mjög mikið :) sem er bara eiginlega gaman en erfitt. Það tekur alveg svakalega orku að hlusta á, lesa og reyna að tala spænsku allan daginn :) Hefði aldrei trúað því...

Síðustu helgi var löng helgi svo við ætluðum að leigja hús ú Manzanillo eins og við gerðum fyrir jól. Við vorum komin með húsið og allt en svo hringir gaurinn og sagði að hann ákvað að legja það frekar vinum sínum...... okkur finnst þetta hálf lélegir viðskiptahættir svona tveim dögum fyrir fríið...
En í staðinn fórum við, fimmtán saman, til Sayulita sem er staður drauma minna, þorpið er svo ljúft og rólegt, endalaust mikið af góðum mat, ströndin er falleg, pálmatré, öldur og það er hægt að fara á brimbretti :)
Ætla svo sem ekki að halda því fram að ég hafi verið góð á því... mig vantar mun sterkar hendur eða hreyfil til að geta farið nógu hratt til að fylgja öldunni... þar sem mér tókst það bara tvisvar þá náði ég ekki alveg að standa upp.... en það kemur bara næst. Handleggir verða teknir fyrir næstu vikurnar í ræktinni, stefnan er tekin að að verða tönuð og tónuð brimbretta gella fyrir vorið :)

Ég tók mig til núna áðan og ákvað að gerast hin fyrirmyndar húsmóðir. Byrjaði á baðherberginu, vaska upp, þurrka af og svona... það svo sem var ekki mikið mál gekk bara vel. Svo fór ég að skúra.... með þessari helvítis moppu, ég er alveg handviss um að sá sem hannaði þetta og setti á markað hefur aldrei nokkurn tíman þvegið gólf, viðurkenni svo sem alvg að skúra er ekki mitt uppáhalds húsverk og ég er ekki góð í því... en þetta var bara hörmung, ég er dauðfeginn að meðleigjandinn var ekki heima að fylgjast með aðförunum. Er ekki viss um að gólfið sé hreinna núna en áður en ég byrjaði... það er allavega minna rykugt, það hlýtur að vera skárra ekki satt....
Ég var að hugsa um að elda einhvern kvöldmat en aðfarir mínar við þrifin eiginlega drógu úr mér allan kjark til að elda.... svo það er spurning hvort við skellum okkur bara á taco eða eitthvað annað í nágrenninu.

Hverfið sem ég á heima í er paradís fyrir fólk sem kann ekki/nennir ekki að elda. Það eru um 100 veitingastaðir í 10 mínútna göngu fjarlægð héðan, skiptir ekki máli í hvaða átt maður labbar... við erum alltaf að uppgötva nýja staði og ákveða að prófa þá, okkur hefur tekist að prófa svona 6-7 staði... okkur fer fram höfum ákveðið að fara aftur á sömu staðina er ekki í boði lengur :)
Annars er allt í þessu hverfi, allir vinsælustu skemmtistaðirnir og barirnir eru hérna í nágrenninu. Það eru tvö stór bíó hérna rétt hjá í tveimur stórum verslunar miðstöðvum. Svo eru svona um fimm torg hérna í göngufjarlægð sem eru með helling af fata, matar og vín búðum og bakaríum og öllu svona svipað og Smáratorg. Strætó stoppið til að fara niðri miðbæ er hérna á næsta götuhorni... já það er semsagt allt hérna rétt hjá nema skólinn og strætó stoppið til að fara í skólann :)

Jamm held að þetta sé orðið gott í bili, minn er orðinn sársvangur og hefur enga einbeitningu lengur :)
Hafið það gott elskurnar
heyrumst, fyrirmyndar húsmóðirin